Məlum olduğu kimi İspaniyanın Kataloniya vilayəti öz müstəqilliyini elan edib. Düzdür, BMT, ABŞ, Avropa Birliyi və demək olar ki, əksər dünya ölkələri bunu separatizm kimi qiymətləndiriblər və İspaniyanın ərazi bütövlüyünü dəstəklədiklərini ifadə ediblər. Artıq İspaniya hökuməti Kataloniyadakı yerli hakimiyyət orqanlarının buraxıldığını və dekabr ayında həmin vilayətdə yeni seçkilər keçiriləcəyini bəyan edib. Respublikamızın da uzun illərdir ki, separatizmdən əziyyət çəkdiyini nəzərə alıb, həmin məqaləni sizin diqqətinizə çatdırmaq istədik. Həm də qeyd etmək lazımdır ki, bu yazıda yalnız iqtisadi aspektlərə toxunulur.
Separatizmin qiyməti: Kataloniyadan olan şirkətlər bir ay ərzində 2 milyard avro itki ilə üzləşiblər. Kataloniyada fəaliyyət göstərən təkcə yeddi şirkətin səhmləri oktyabr ayı ərzində 2% aşağı düşüb. Madrid fond birjası İBEX-də yeddi katolon şirkəti müstəqilliklə bağlı referendum nəticəsində 2 milyard avro itirib. Həmin yeddi şirkətin dəyəri 25 gün ərzində 1,94 milyard avro aşağı düşüb. Həmin şirkətlər bunlardır: Caixabank, Sabadell, Gas Natural Fenosa, Abertis, Grifols, Cellnex və Colonial. Hazırda bütün şirkətlər, yalnız Grifols istisna olmaqla Kataloniya hüdudlarını tərk edəcəklərini bəyan ediblər. Referendum şirkətlərin Kataloniyadan kütləvi köçünə 
təkan verib. Mətbuatın yazdığına görə, oktyabrın 2-dən bəri regionu 1821 şirkət tərk edib. Nəşrlərin xəbərlərində bildirilir ki, yalnız cümə günü Kataloniyanı 140 şirkət tərk edib ki, onlardan da 131-i Barselonada fəaliyyət göstərirdi. Kataloniyanın bələdiyyə orqanlarının məlumatına görə, şirkətlərin köçünə gətirib çıxaran əsas səbəb, mərkəzi hökumətin başçısı Mariano Raxoyun bəyanatları olub. Nəticələri tanınmayan referendumun ardından Caixabank və Sabadell (həcminə görə İspaniyanın 3-cü və 5-ci iri bankları) Barselonanı tərk edəcəklərini elan etdilər. Bu qərar tezliklə Moodyʼs reytinq agentliyi tərəfindən pozitiv addım kimi qiymətləndirildi. Qeyd etmək lazımdır ki, Kataloniya ölkənin ən varlı hissəsi sayılır, İspaniya ÜDM-nin 20 faizi burada istehsal edilir.
Ən son mühasibat xəbərlərini qaçırmaq istəmirsinizsə, bu linkə daxil olaraq XƏBƏRLƏRƏ ABUNƏ OLUN.
