Rusiya prezidenti Vladimir Putin 2021-ci ildən illik gəliri beş milyon rubldan çox olan zəngin vətəndaşlar üçün fiziki şəxslərin gəlir vergisi (fərdi mənfəət vergisi) dərəcəsinin 15 faizə qədər artırılması haqqında qanunu imzalayıb. Sənəd hüquqi məlumatların rəsmi internet portalında dərc olunub.
Qanunda bir neçə istisnalar da nəzərdə tutulur. Məsələn, şəxsi əmlakın satışı zamanı faiz dərəcəsi əvvəlki (13 faiz) kimi qalacaq, həmçinin artım sığorta və pensiya təminatı müqavilələri üzrə sığorta ödənişlərinə şamil edilməyəcək.
Daha əvvəl Maliyyə Nazirliyindən, prezidentin göstərişlərinə uyğun olaraq, 2021-ci ildən etibarən 15 faizə qədər artırılan fərdi gəlir vergisi dərəcəsinin yalnız gəlirləri beş milyon rubldan yuxarı olan rusiyalılar üçün, həm də 5 milyondan yuxarı olan məbləğə tətbiq ediləcəyi deyilirdi.
Digər tərəfdən, Ali iqtisad məktəbinin ekspertlərinin fikrincə, varlılar üçün vergi bundan sonra da artırıla bilər. 20 milyon və 24 milyon rubldan çox gəlirləri olan ruslar üçün fərdi mənfəət vergisini 20-24 faizədək artırılmasından söhbət gedir. Bundan başqa, ekspertlər gəlir vergisinin faiz dərəcəsini 30 faizə qaldırmağı təklif ediblər.